CANGAS DEL NARCEA.- Hoy se inicia la Sumana de las LLetras
Ente’l 4 ya’l 8 de mayu vei celebrase en Cangas la VII Sumana de las Ḷḷetras Asturianas.
El Serviciu de Normalización Ḷḷingüística del Conceyu Cangas prepara pa la edición d’estiañu un montón d’actividades variadas. La primera d’eḷḷas vei ser la presentación de la exposición sobre mascarada asturiana: Anxelinos somos, cuartinos pidimos, a cargu del grupu de recuperación de la tradición Vezos.
Siguirá a esta xornada outra igual d’interesante, yá que’l martes 5 de mayu tendremos el placer d’escuitar en directo a las integrantes de l’Asociación Cultural Lo Nueso, que van ofrecenos un conciertu con muitas colaboraciones musicales ya inda más sorpresas.
El miércoles un grupu de teatru amateur a la dirección de Pilar Berguño Arbas deixará claru’l potencial artísticu bárbaru del alumnáu del IES Cangas del Narcea, que vei dar no gustu de propios ya extraños al traviés d’una comedia clásica del autor latinu Plauto, Aulularia, na súa versión asturiana La comedia la pota.
El xueves tocará rindise a los protagonistas de la conmemoración d’estiañu: texer palabras, semar futuru, los nenos. Asina dende las 10 de la mañena ya hasta las 13:20 concentraránse no Polideportivu del Conceyu Cangas 500 escolinos ya escolinas del conceyu pa compartir una xunta mui especial cargada de teatru, música ya risas.
Empicipiaremos con una representación teatral de la mano d’Olga Cuervo, Al abrigu los cuentos; siguiremos cona entrega de premios del VII Concursu de cuentos curtios Otilio Álvarez Rodríguez, espuéis saldrá a escena Petit Pop cono sou trabayu Pop piquiñín pa carganos las pilas ya, p’acabar, pondremos a prueba las nuesas aptitudes musicales de mano del Cantar del Vasu.
El vienres pondráse’l broche a esta sumana tan especial, pa faelo, acompañarános Antón García, ganador de la XXXV edición del premiu de novela Xosefa Xovellanos, que vei falanos de la súa novela Crónica de la lluz y la solombra, na que retrata con finura unu de los crímenes más sonaos del conceyu Tinéu, protagonizáu por Rafael González Gancedo, vecín de La Zorera (Tinéu), que en 1899 foi condenáu a muerte pol doble asesinatu de la súa muyer ya’l sou fíu convirtiéndose no últimu sentenciáu a garrote vil en plaza pública del estáu.
Esti mesmu día, otorgaráse’l galardón correspondiente a la figura sobresaliente na tresmisión ya emponderamientu de la nuesa ḷḷingua, nesti casu a Pepe’l Maestru de Bisuyu.
