CANGAS DEL NARCEA.- X Sumana de las Lḷetras Asturianas

El Conceyu Cangas organiza un añu más, al traviés del Serviciu de Normalización Ḷḷingüística, la Sumana de las Ḷḷetras Asturianas. Cumo tódolos años, la normalización ya dignificación del nuesu idioma incluirá a tódolos públicos en tódolos espacios posibles ya con formatos variaos, que dan cuenta del valir ya tresversalidá del idioma propiu.

Abre la sumana una obra de teatru n’Araniegu, Un arrelu inesperáu, del grupu de teatru amateur La Páxara Pinta. Esta actividá pretende ser un intentu de deslocalizar ya aveirar los actos a espacios normalmente ayenos a esti tipu de programación.

Siguen a esti actu dous destinaos a públicu adolescente ya a públicu infantil.

El primeiru d’eḷḷos, el ḷḷunes 14, celebraráse nel IES de Cangas del Narcea ya incluirá tamién una obra de teatru, nesti casu a cargu de Carlos Alba “Cellero”, que nos ofrecerá la crónica d’El Pola, un adolescente que deixa prematuramente l’institutu ya, aventuras varias mediante, decide retomar los estudios.        Esta obra pretende concienciar a los adolescentes de la importancia de la educación al traviés d’un monólogu divertíu ya amenu tituláu El Pola. Memories d’un quinqui. Monólogos y rock&roll.

         El segundu, el martes 15, ta destináu al públicu más menudu ya inclúi tamién una obra de teatru, La neña de les trences al revés, del Callejón del Gato Teatro ya un taller de teatru a cargu de Factoría Norte. La obra teatral fala de la importancia de la multiculturalidá ya l’intercambiu cultural, al traviés de la relación amistosa establecida ente dúas nenas mui diferientes ya, al tiempu, mui parcidas.

El miércoles 16, ábrese yá la programación a tódolos públicos, a traviés d’un conciertu del grupu cangués “Lo Nueso”, que nos acercará cantares de siega, de boda, romances ya outras piezas tradicionales tocadas ya cantadas con rigor ya respetu pola tradición ya acompañadas de muitos elementos vinculaos a la cultura’l pan. Un espectáculu con muitas sorpresas que nun vos podéis perder.

El xueves 17 ríndese homenaxe a una persona que nun necesita cuasi presentación, Antón Chicote, unu de los homes más queríos de Cangas, persona sabia ya entrañable ande las haiga. Nel actu participarán personaxes bien conocíos del mundu la tonada, qu’acompañarán a Antón nesti día de fiesta: María Rosario González, José Manuel Collado, José Antonio González, Celestino Rozada ya’l gaiteiru Ramón García.

El vienres 18 pondráse fin a esta xornada de celebración cona actividá “Entama la nueite”, que pretende crear un espaciu onde baiḷḷadoras ya baiḷḷadores ya tocadoras ya tocadores de música tradicional puedan xuntase ya compartir un día de música ya fiesta.

La conceyala de Cultura, Carmen Riesco, recalca la importancia de dignificar las nuesas ḷḷetras al traviés d’actos d’esti tipu, qu’incluyan ya refuercen los vínculos colo que somos ya colos que somos ya anima a toda la ciudadanía canguesa a sumase a esta gran celebración de las nuesas ḷḷetras.

 

.Comparte en tus redes sociales
Share on Facebook
Facebook
Tweet about this on Twitter
Twitter
Share on LinkedIn
Linkedin
Pin on Pinterest
Pinterest
Share on Tumblr
Tumblr

Deja una respuesta

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.